कर्णालीको बजेटबारे राप्रपा : व्यक्तिको घरमा गोठ बनाउनका लागि बजेट छुट्याउनु लाजमर्दो

असार ५, काठमाडौं । कर्णाली सरकारले शुक्रबार ल्याएको आगामी आर्थिक वर्षको बजेटबारे प्रदेश सभामा छलफल सुरु भएको छ । सभाको १२ औँ बैठकमा राप्रपाले बजेट मुख्यमन्त्री, अर्थमन्त्री र केही सत्तापक्ष र पूर्व मुख्यमन्त्रीको जिल्ला तथा निर्वाचन केन्द्रित भएको आरोप लगाएको छ ।

राप्रपा सांसद सन्तोषी शाहीले ६९ पेजको वक्तव्य सिङ्गो कर्णाली प्रदेशमा केन्द्रित नभई सीमित जिल्ला र मानिसलाई मात्र फाइदा पुग्ने गरी विनियोजन गरेको बताइन् ।

‘म यो बजेट असन्तुलित, भेदभावपूर्ण, कार्यकर्तामुखी रअहिलेको आर्थिक सङ्कट झन् बढाउने र राज्यकोषको दोहन गर्ने भएकाले गम्भीर असहमति प्रकट गर्दछु,’ उनले भनिन्, ‘बजेटका प्राथमिकता, सिद्धान्त र प्रमुख नीतिहरू एकातिर र सांसदहरूले दिएका सुझावहरू अर्कैतिर पन्छाएर आफ्नो व्यक्तिगत सम्पत्ति जसरी राज्यकोषको दुरुपयोग हुने गरी विनियोजन गरेकोमा प्रदेशबासी तथा सचेत नागरिकलाई भण्डाफोर गर्न आग्रह गर्दछु ।’ 
 

सांसदहरूले महिनौँ लगाएर सुझाव दिने तर सरकारले मनपरी गर्दै हिँड्ने हो भने आफूहरूले सुझाव दिइरहनु र संसद्मा बोलिरहनुको कुनै औचित्य नभएको भन्दै उनले आपत्ति जनाइन् । 
यतिमात्र होइन सांसदका सुझाव ग्रहण नगर्ने भए 
सांसदहरूको महत्त्वपूर्ण समय खेर गएको टिप्पणी उनको छ । उनले अगाडि भनिन्, ‘हाम्रा कामकारबाही प्रति जनताले राम्ररी नियालिरहेका छन् । तर सरकारले अनदेखा गर्दै नागरिकको भावनामाथि मजाक उडाइरहेको छ । दुःख लाग्छ, सरकार भन् बजेटमार्फत मनपरी र राज्य कोषको दोहन गर्न लागिपरेको छ ।’