स्वर्गीय लामू अमात्य नेपालको पहिलो नर्स

काठमाडौं । नेपालको पहिलो नर्स को हो भन्ने प्रश्नको उत्तर अब सजिलो भएको छ । स्वास्थ्य मन्त्रालयले आइतबार नेपालको पहिलो नर्सको नाम घोषणा गरेको छ ।

७ माघ ०७३ मा भएको निर्णय बमोजिम स्वास्थ्य मन्त्रालयले स्वर्गीय लामू अमात्यलाई नेपालको पहिलो नर्स घोषणा गर्दै प्रमाणपत्र दिएको हो ।

स्वास्थ्य मन्त्री गगन थापाले पहिलो नर्सको आधिकारिक प्रमाणपत्र स्वर्गीय अमात्यका छोरा गायक योगेश्वर अमात्यलाई एक कार्यक्रमका बिच हस्तान्तरण गरेका छन् ।

लामू विक्रम संवत् १९८८ माघ १४ गते दार्जलिङमा जन्मेकी थिइन् । उनले वि।सं।२०११ मा भारतको कलकता मेडिकल कलेजबाट नर्सिङ पढाइ पूरा गरेको छोरा योगेश्वर अमात्यले बताउनुभयो । योगेश्वरका अनुसार पढाइ सकाएपछि लामूले आफ्नै लगानीमा क्षेत्रपाटीमा नर्स स्कुल समेत खोलेकी थिइन् ।

उनले ३० फागुन २०१२ देखि नेपालमा नर्सका रुपमा सेवा दिन थालेकी थिइन् । स्वास्थ्य मन्त्रालय अन्तर्गत नर्सिङ तालिम परियोजनाबाट उनले काम सुरु गरेकी थिइन् । उनको निधन भने १९ जेठ ०६९ मा भएको थियो । महिला खबरमा प्रकाशित स्टोरी ।