रेणुु दाहाल महानगरकै पहिलो महिला मेयर, भरतपुर महानगरपालिकामा दुवै प्रमुख पदमा महिला

काठमाडौं। लामो अन्यौल र प्रतिक्षापछि भरतपुर महानगरपालिकामा कांग्रेस माओवादी गठबन्धनको तर्फबाट रेणुु दाहालले मेयर पदमा बाजी मारेकी छिन् । सोही गठबन्धनकी पार्वती शाहले उपमेयरमा जित हासिल गरेकी छिन् ।

भरतपुर महानगरपालिकाको मेयरमा जित हासिल गरेकी रेणुु दाहाल त्यहाँको मात्र होइन, देशकै पहिलो महिला मेयर बनेकी छिन् । पहिलो र दोश्रो चरणको स्थानीय निर्वाचनमा महिला मेयर हुनेहरु केही रहे पनि महानगरकै प्रमुख पदमा भने महिला निर्वाचित हुन सकेका थिएनन् । सरकारले काठमाडौंसहित देशमा ६ वटा महानगर बनाएपछि पहिलोपटक भएको स्थानीय निर्वाचनमा रेणुुले निर्वाचन सम्पन्न भएका ५ वटा महानगरमध्येबाट पहिलो मेयर बन्ने शौभाग्य प्राप्त गरेकी छिन् । नेपालमा महानगरपालिकाको पहिलो मेयरको रेकर्ड रेणुुको नाममा बनेको छ । 

दुवै प्रमुख पदमा महिला

भरतपुरमा कांग्रेस माओवादी गठबन्धनको जितसँगै दुवै प्रमुख पदमा महिला निर्वाचित हुने रेकर्ड समेत कायम भएको छ । संभवत हालसम्म कुनै पनि स्थानीय तहमा प्रमुख र उपप्रमुख दुवै पदमा महिलाले बाजी मारेका थिएनन् । तर, ६ मध्येको एक महानगर भरतपुरमा मेयरमा माओवादीकी रेणुु दाहालले जितिन् भने उपमेयरमा कांग्रेसकी पार्वती शाहले बाजी मारिन् । दुवै प्रमुख पदमा महिला निर्वाचित भएपछि उनीहरुको नेतृत्वले अन्य महानगरको तुलनामा कस्तो काम गर्ने हो त्यो पनि सबैका लागि चासोको बिषय बन्ने देखिन्छ । आफूहरुलाई काम गर्ने वातावरण दिए पुरुषले भन्दा राम्रो काम गरेर देखाउने भन्दै बेला बेला महिला नेतृहरुले गर्ने गरेको दाबीलाई रेणुु र पार्वतीले कसरी सार्थक पार्ने हुन्, त्यो पनि हेर्नलायक नै हुनेछ ।