मिस नेपाल २०१७ को आवेदन खुल्यो

काठमाडौं। नेपालको सबैभन्दा जेठो र प्रतिष्ठित सौन्दर्य प्रतियोगिता मिस नेपाल प्रतियोगिताको २०१७को संस्करणका लागि आयोजक संस्था द हिडेन ट्रेजरले आधिकारिक रुपमा आवेदन खुल्ला गरेको छ । राजधानीको होटल अन्नपूर्णमा आयोजित एक कार्यक्रमका वीच मिस नेपाल प्रतियोगिताको २२औं संस्करणका रुपमा द हिडेन ट्रेजर मिस नेपाल २०१७को विधिवत् आरम्भ भएको जानकारी गराइएको हो । मिस नेपाल प्रतियोगितामा सहभागि हुन इच्छुक युवती १९ देखि २५ वर्ष उमेर समूहको हुनुपर्ने, शारारिक ऊचाई कम्तीमा पाँच फिट चार इन्च हुनुपर्ने, दश जोड दुई वा सो सरहको अध्ययन पूरा गरेको हुनुपर्ने, नेपाली नागरिक भई नेपाली पासपोर्ट धनी हुनुपर्ने, अविवाहित हुनुपर्ने मुख्य माण्डदण्ड तोकिएको छ । यी मापदण्ड पूरा भएका एनआरएन युवतीले पनि मिस नेपाल प्रतियोगिताका लागि आफ्नो आवेदन दिन सक्नेछन् । 

देशका मुख्य शहरहरु विराटनगर, पोखरा, चितवन, धरान, नेपालगंज, बुटवल र धनगढी हुादै अप्रिल महिनाको दोस्रो सातातिर राजधानी शहरमा आवेदन दिएकाहरुको अडिसन प्रक्रिया संचालन गरिने आयोजक संस्थाले जनाएको छ । अडिसनबाट चयन भएका फाइनलिष्टहरु ६ साता लामो प्रशिक्षणमा सहभागि हुने बताइएको छ । जसमा मुख्य प्रशिक्षकका रुपमा कोरियोग्राफर रचना गुरुङ शर्मा रहनेछन् । राजभाई सुवाल अफिसियल फोटोग्राफर रहने मिस नेपाल २०१७का लागि वुमेन्स प्लानेट र आकर्षण बुटिक वार्डरोब डिजाइनर रहेनछन् भने रिभिल टिम मेकअप तथा हेयरको जिम्मेवार हुनेछ भने शान्ति युनिसेक्स सलुनको सहकार्य रहनेछ । सहभागिहरुको फिटनेसको ध्यान जस्मिन फिटनेस एण्ड स्पाले लिनेछ भने यस पटकका विजेता सुन्दरीहरुको ताज तथा ज्वेलरी डिजाइन आर.बी. डायमण्ड ज्वेलर्सले गर्ने तय भएको छ । 

यस पटक आउँदो जून २ तारिखमा राजधानीको दरबारमार्गस्थित होटल अन्नपूर्णमा संचालन हुने मिस नेपाल २०१७ को ग्राण्ड फिनालेबाट मिस नेपाल वल्र्ड, मिस नेपाल अर्थ, मिस नेपाल इन्टरनेसनल लगायत मिस नेपाल एशिया प्यासेफिक इन्टरनेसनलका रुपमा विजेताहरु चयन हुनेछन् । उनीहरुले क्रमश: २०१७ को मिस वल्र्ड, मिस अर्थ, मिस इन्टरनेसनल तथा मिस एशिया प्यासेफिक इन्टरनेसनलको अन्तर्राष्ट्रिय प्रतियोगितामा नेपालको सहभागिता जनाउनेछन् । यस बाहेक प्रतियोगितामा ट्यालेन्ट, मोस्ट इन्टेलेक्चुयल, फ्रेन्डशीप, वेष्ट हेयर, मिस फ्यासिनो, कन्फिडेन्ट, फोटोजेनिक आदि विधामा पनि विजेता गरिनेछ ।