कांग्रेसकी माया राना तनहुँको म्याग्दे गाउँपालिकामा विजयी

काठमाडौं। स्थानीय तह निर्वाचनमा म्याग्दे गाउँपालिकाको अध्यक्षमा महिला उम्मेदवार विजयी भएकी छिन् । कांग्रेसकी उम्मेदवार माया रानाले ४ हजार ५ सय ६४ मत ल्याएर जितेको निर्वाचन अधिकृत नवराज आचार्यले जानकारी दिए ।

कांग्रेसको भातृ संगठन  नेपाल महिला संघकी केन्द्रीय सदस्य समेत रहेकी राना अध्यक्ष पदमा निर्वाचित हुने जिल्लाको पहिलो उम्मेदवार भइन् । रानाका निकटतम प्रतिद्वन्द्वी एमालेका श्रीप्रसाद श्रेष्ठले ३ हजार ५ सय ६४ मत पाएका थिए ।

उपाध्यक्षमा पनि कांग्रेसकै बालकृष्ण घिमिरे विजयी भए । उनले ४ हजार ७ सय १४ मत पाएका छन् । घिमिरेका निकटतम प्रतिद्वन्द्वी एमालेकी रत्ना घिमिरेले ३ हजार २ सय ६० मत पाएकी थिइन् । यो गाउँपालिकाको वडा नं। १, ३, ४ र ५ कांग्रेस र २, ६ र ७ मा एमालेका अध्यक्षहरु विजयी भएका छन् । यो घोषणासँगै तनहुँका ३ गाउँपालिका कांग्रेसले जितेको छ । २ वटामा एमाले र १ वटामा माओवादी अध्यक्ष र उपाध्यक्षका उम्मेदवार विजयी भएका छन् । यो खबर आजको कान्तिपुरमा छापिएको छ।