अमेरिकाको सर्वोच्च अदालतको न्यायाधीशमा पहिलो पटक ५१ वर्षीया अश्वेत महिला नियुक्त

चैत २६, काठमाडौं ।  इतिहासमै पहिलो पटक अमेरिकी सर्वोच्च अदालतको न्यायाधीश पदमा अश्वेत महिला नियुक्त भएकी छन् । राष्ट्रपति बाइडेनले सिफारिस गरेकी ५१ वर्षीया केतान्जी ब्राउन ज्याक्सनलाई सर्वोच्च अदालतको न्यायाधीशका लागि अमेरिकाको माथिल्लो सदनले अनुमोदन गरेको अन्तर्राष्ट्रिय समाचार संस्था द गार्जियनले जनाएको छ । 

अमेरिकी सर्वोच्च अदालतका ८३ वर्षीय न्यायाधीश स्टेफेन ब्रेयरको कार्यकाल सकिएसँगै उनको स्थानमा ज्याक्सन आएकी हुन् । न्यायाधीशको रुपमा ज्याक्सन नियुक्त भइसकेपछि राष्ट्रपति बाइडेनले ट्विटरमार्फत उनीसँगको एक सेल्फी पोस्ट गर्दै ज्याक्सनको मनोनयन ऐतिहासिक भएको बताएका छन्।

जम्मा १ सय सदस्य रहेको अमेरिकाको माथिल्लो सदनमा ज्याक्सनको पक्षमा ५३ मत खसेको थियो भने उनको विपक्षीको पक्षमा ४७ मत खसेको थियो । प्रमुख प्रतिपक्षी पार्टी रिपब्लिकनका तर्फबाट सिनेटर मिट रोम्ने‚ लिसा मुर्कोस्की र सुसान कोलिन्सले समेत ज्याक्सनको पक्षमा मतदान गरेपछि उनी सर्वोच्च अदालतको न्यायाधीश बनेकी हुन् ।

नवनियुक्त न्यायाधीश ज्याक्सन यसअघि डीसी सर्किट अदालतकी न्यायाधीशको रुपमा कार्यरत थिइन् । उनी सर्वोच्च अदालतकी ११६औं न्यायाधीशसमेत बनेकी छन् ।