भदौ २, सुन्दरहरैँचा, मोरङ । विश्वको सर्वोच्च शिखर सगरमाथाको सफल आरोहण गरेवापत महिला पत्रकार रोशा बस्नेतलाई सम्मान गरिएको छ ।
आठ हजार ८४८ मिटर अग्लो हिमालको सफल आरोहण गरी मोरङ जिल्ला तथा सुन्दरहरैँचा नगरपालिकाको झण्डा तथा नक्सालाई चुचुरोमा फहराएर देखाएको अदम्य साहसको प्रशंसा गर्दै सुन्दरहरैँचा नगरपालिकाले उहाँलाई सम्मान गरेको हो ।
सुन्दरहरैँचा नगरपालिकाद्वारा आज यहाँ आयोजित समारोहमा नगरप्रमुख शिवप्रसाद ढकालले खादा, माला तथा सम्मान पत्रबाट उहाँलाई सम्मान गर्नुभएको छ । मोरङ सुन्दरहरैँचा नगरपालिका¬–१० स्थित विराटचौककी २९ वर्षीया रोशा बस्नेत राष्ट्रिय समाचार समिति (रासस)मा कार्यरत पत्रकार हुनुहुन्छ । प्रथम महिला पत्रकार सगरमाथा आरोहण–२०१८ समूहका पाँच सदस्यमध्ये उनीसहित चार जनाले यसै वर्षको जेठ ९ गते सगरमाथाको सफल आरोहण गरेकी थिइन् ।
सो अवसरमा नगरप्रमुख ढकालले प्रदेश नं १ कै गौरव तथा गरिमाका रुपमा रहेको सगरमाथाको यसै नगरकी चेली रोशा बस्नेतले सफल आरोहण गरेकाले आफूलगायत सम्पूर्ण नगरवासी गौरवान्वित भएको बताउँदै यो कार्यले नगरको गरिमा र पहिचान पनि थप उच्च भएको छ भन्नुभयो ।
यसैगरी नगर कार्यपालिका सदस्य भक्तकिरण राईले बस्नेत आरोहणमा जानुअघि ‘गर्विलो पहाड चढ्दैछौँ’ बोलको गीत गाएर बिदाइ गरेको स्मरण गर्दै आफूले गाएको गीतलाई सार्थक बनाएकामा हर्ष व्यक्त गर्नुभयो ।
सम्मानित बस्नेतले आफ्नो नगरको पर्यटन क्षेत्रको प्रवद्र्धनसँगै महिला सशक्तीकरण र युवा जागरणको क्षेत्रमा समेत कार्य गर्ने प्रतिवद्धता व्यक्त गर्नुभयो ।