विद्युत प्राधिकणको लापरवाहीले ४० वर्षीया महिलाको ज्यान गयो

असार १२, दोलखा । नेपाल विद्युत प्राधिकरणको लापरवाहीका कारण दोलखा भीमेश्वर नगरपालिका वडा ५ अम्बोटेकी दुर्गा बुढाथोकीको करेन्ट लागेर मृत्यु भएको छ ।

विजुलीको तारको लागि खेतमा गाडिएको काठको पोललाई सहारा दिन तानिएको तारमा करेन्ट प्रवाह हुँदा भीमेश्वर नगरपालिका वडा नम्बर ५ विरुवाकी अन्दाजी ४० वर्षीया दुर्गा बुढाथोकीको घट्ना स्थलमै मृत्यु भएको जिल्ला प्रहरी कार्यालय दोलखाका प्रहरी निरीक्षक रेशम बोहोराले बताए ।

विद्युत प्राधिकरणले पोल गाड्दा लापरवाही गरेर नाङ्गो तारमा छुने गरी सर्पोट दिने तार तानेर खेतको आलीमा ढुङ्गाले अड्काएर राखेको स्थानीयले बताएका छन् । बुधबार रोपाईको क्रममा खेतनजिक घरमा पानी लिन जाने क्रममा उक्त तारमा छुईएर बुढाथोकीको मृत्यु भएको प्रहरीले जनाएको छ ।

पीडित पक्षले उचित क्षतिपूर्तिसहित छोराछोरीको पठन पाठनमा सहयोग र जेठी छोरीलाई रोजगारीको व्यवस्था गरिनुपर्ने माग गरेका छन् । विद्युत प्राधिकरणले पाँच लाख क्षतिपूर्ति दिने र जेठी छोरीलाई रोजगारी दिने बताए पनि सहमति हुन नसकेको प्रहरी निरीक्षक बोहोराले बताए ।

नेपाल विद्युत प्राधिकरणले जिल्लाको अधिकांश ग्रामीण क्षेत्रमा लापरवाही तरीकाले पोल गाड्ने र तार तान्ने काम गरिरहेको र त्यसबारे गुनासो गर्दा सुनवाई नभएको स्थानीयको आरोप छ । 
स्रोत : महिला खबर