असार १४, काठमाडौं । नेपाली साहित्य जगत्मा महिला समालोचकको सङ्ख्यामा कमी रहेकाले घरपरिवार एवं समाजले प्रोत्साहन गर्नुपर्नेमा जोड दिइएको छ ।
सिसार साहित्य प्रतिष्ठानले आज यहाँ आयोजना गरेको महिला समालोचक देवी गुणीद्वारा लिखित ‘हरिविक्रम केसी व्यक्ति र कृति’ समालोचना ग्रन्थको लोकार्पण कार्यक्रमका सहभागीले अवसर दिए महिला पनि लेखन क्षेत्रमा अब्बल भएर आउने बताउनुभयो ।
कार्यक्रममा पद्ममकन्या क्याम्पसकी पूर्वप्राध्यापक रञ्जुश्री पराजुलीले देवीजस्ता महिला समालोचकको सङ्ख्या वृद्धि गर्न सबैको सहयोग हुनुपर्ने विचार राख्नुभयो । ‘मसान’ शीर्षकको एउटै नाटक लेखे पनि गोपालप्रसाद रिमाल प्रसिद्ध नाटककार हुनुभएजस्तै थोरै गुणस्तरीय कृतिले स्रष्टालाई अमर बनाउने उहाँले बताउनुभयो ।
केसीले ‘भावनाका भुल्काहरु’ एउटै कविता सङ्ग्रह लेखेपनि राम्रो भएकाले नै समालोचना कृति प्रकाशित गर्न लेखकलाई प्रेरणा मिलेकामा कार्यक्रमका वक्ताले जोड दिनुभएको थियो । प्रतिष्ठानका अध्यक्ष ज्ञाननिष्ठ ज्ञवालीले विसं २०३५ मै शुरु भएर बन्द रहेको सिसार साहित्यिक द्वैमासिक पत्रिकालाई विसं २०६४ देखि पुनःनिरन्तरता दिइएको उल्लेख गर्नुभयो ।
सो अवसरमा प्रा डा विष्णुराज आत्रेय, लक्ष्मीप्रसाद ज्ञवाली, स्रष्टा केसी, लेखिका गुणी, लोकेन्द्रराज भट्टराई, कविता केसीलगायतका वक्ताले महिला समालोचकलाई नेपाली साहित्यमा अझै बढी प्रेरणाको आवश्यकता रहेकामा ऐक्यबद्धता जनाउनुभएको थियो ।
कविता बस्नेत र विनोद भण्डारीले प्रकाशन गर्नुभएको समालोचना मूल्य रु २११ छ । लेखिकाको यो पहिलो समालोचना कृति भएको कार्यक्रममा जानकारी गराइयो । सो अवसरमा सिसारको अङ्क १६ समेत सार्वजनिक गरिएको थियो ।
- रासस