प्रदेश सांसद जगतारैन देवीले नै गरिन् बुहारीमाथि हिंसा

फागुन १३, ललितपुर । प्रदेश नम्बर २ की सांसद जगतारैन देवी साहकी बुहारी पिंकीकुमारी साहले सासूसहित परिवारले नै आफूमाथि हिंसा गरेको आरोप लगाएकी छिन् ।

पिंकीले श्रीमान देवशरण, सासू जगतारैन र ससुरा स्वामीशरणले आफूमाथि हिंसा गरेको आरोप लगाएकी हुन् । भारतको चण्डीगढमा श्रीमान देवशरण बस्दै आएका र एक छोरी सहित आफू सिराहास्थित घरमा बस्दा सासू ससुराले खान लाउन पनि नदिएको आरोप लगाएकी हुन् । उनले श्रीमानले बेवास्ता गर्ने र सासू ससुराले खान लाउन पनि नदिएको भन्दै उनले जिल्ला अदालत सिराहामा मुद्दा समेत दायर गरेकी थिइन् । मानाचामल माग गर्दै दायर गरेको मुद्धा गएको माघ १० गते जिल्ला अदालत सिराहाले फैसला गरेको छ ।

‘मासिक १० हजार रुपैयाँ पाउने गरि फैसला भएको छ’ पिंकीले महिला खबरसँग कुरा गर्दै भनिन्, ‘फैसला भएको एक महिनाभन्दा बढी भइसक्दा पनि मैले खर्च पाएको छैन ।’

पिंकीले २०७४ साल भदौ ८ गते जिल्ला अदालत सिराहामा मुद्दा दायर गरेकी थिइन् । २६ वर्षकी पिंकीले २०६० सालमा विवाह गरेको अदालतमा दायर गरेको मुद्दाको मिसिलमा उल्लेख छ ।

पिंकीको माइती जनकपुर हो । उनका अभिभावकले १ लाख ५१ हजार रुपैयाँ दाइजो दिएर विवाह गरेको पिंकीले बताइन् । ‘विवाह पछि केही समय श्रीमान र परिवारले पनि राम्रो व्यवहार गरेका थिए’ पिंकीले भनिन्, ‘एक वर्षजति पछि दाइजो पुगेन भनेर सासूससुराले हेला गर्न थाले ।’

उनले श्रीमान बसेको ठाउँमा जाँदा पनि आफूलाई कुटेर पठाएको गुनासो गरिन् । उनले भनिन्, ‘छोरी गर्भमा रहँदा पनि मलाई पिट्ने गरेपछि बस्न नसकेर घर आएँ ।’ अहिले पिंकीको ३ वर्षकी छोरी पनि छिन् । छोरीको समेत हेरचाह र पढाइ खर्च श्रीमानले नदिएको उनको गुनासो छ ।

पिंकीका ससुरा स्वामीनारायण साहले भने बुहारीमाथि हिंसा नगरेको दाबी गरे । ‘आफै श्रीमान र हामीसँग मिलेर बस्न सकिन’ महिला खबरसँग कुराकानी गर्दै स्वामीनारायणले भने, ‘मेरो श्रीमतीलाई र परिवारलाई नराम्रो देखाउन उसले यस्तो गरेकी हो ।’

उनले अदालतले गरेको फैसला अनुसार छोराले उसलाई खर्च दिने बताए । ‘अदालतले जे भन्छ त्यो स्वीकार गर्छु’ स्वमीनारायणले भने । प्रदेश नम्बर २ की सांसद जगतारैन देवी साह भने बिरामी परेको भन्दै बोल्न स्वीकार गरिनन् । 
स्रोत : महिला खबर