असार १०, काठमाडौं । उपन्यासकार तथा लेखक देवेन्द्र न्यौपानेको चेतनामूलक उपन्यास ‘सङ्गत’ विमोचन गरिएको छ । नेपाल प्रहरीको लागुऔषध ब्यूरोद्वारा अन्तर्राष्ट्रिय लागुऔषध दुरुपयोग तथा अवैध ओसारपसारविरुद्ध दिवसको पूर्वसन्ध्यामा सोमबार यहाँ आयोजित कार्यक्रममा लेखक न्यौपानेको उक्त उपन्यास विमोचन गरिएको हो ।
उपन्यास महानगरीय प्रहरी कार्यालयका प्रमुख एवं प्रहरी नायब महानिरीक्षक शैलेश थापा क्षेत्री र लागुऔषध ब्यूरोका प्रमुख प्रहरी नायब महानिरीक्षक दिनेश अमात्यले संयुक्तरूपमा विमोचन गर्नुभयो । कार्यक्रममा प्रहरी नायब महानिरीक्षक क्षेत्रीले काठमाडौँ उपत्यकामा प्राकृतिक लागुऔषधभन्दा औषधिजन्य लागुऔषधको समस्या बढ्दै गएको बताउनुभयो । “लागुऔषधको दुरुपयोग नियन्त्रणका लागि प्रहरीका साथसाथै स्थानीय समुदायको पनि महत्वपूर्ण भूमिका रहेको छ”, उहाँले भन्नुभयो ।
प्रहरी नायब महानिरीक्षक अमात्यले कुलतमा लागेका व्यक्तिले मात्र नभएर घरपरिवार र समाजले समेत निकै ठूलो मूल्य चुकाउनुपरेको बताउनुभयो । एउटा किशोरले कुलतबाट छुटकारा पाउन गरेको अठोट, त्यसका लागि उसले चालेको कदम र यसबाट उसको जीवनमा आएको परिवर्तनलाई समेटेर उपन्यास लेखिएको उपन्यासकार न्यौपानेले बताउनुभयो ।
नेपालमा हाल एक लाख ५० हजार बढी युवा कुलतमा फसेको गृह मन्त्रालयको तथ्याङ्कमा उल्लेख छ । नेपालमा वार्षिक १२ प्रतिशतको गतिमा लागुऔषध प्रयोगकर्ता बढ्दै गएको भन्दै यसलाई नियन्त्रण गर्न गृह मन्त्रालयले हरेक वर्ष सप्ताहव्यापी कार्यक्रमसमेत सञ्चालन गर्दै आएको छ । हाल नेपाल प्रहरी, सशस्त्र प्रहरी बलले लागुऔषध दुरुपयोग रोक्नका लागि विशेष योगदान पु¥याएका छन् ।
सोही अवसरमा लागुऔषध दुरुपयोग तथा अवैध ओसारपसारलाई समेटेर बनाइएको सडक नाटक, नृत्य र ब्याण्डसमेत प्रस्तुत गरिएको थियो ।
रासस