असार ५, कैलाली । कैलालीको गौरीगंगा नगरपालिकाले नगरभित्रका गर्भवती र सुत्केरी महिलाहरुलाई निशुल्क एम्बुलेन्स् उपलब्ध गराउने भएको छ । गौरी गंगा नगरपालिकाका प्रमुख भीम देउवाले आ।ब। २०७६/०७७ को नीति कार्यक्रम सम्बन्धमा सुझाब संकलन तथा अन्तरक्रिया कार्यक्रममा यस्तो बताएका हुन् ।
उनले नगरपालिकामा तीन वटा एम्बुलेन्स् खरिद गरेको बताउँदै एउटा एम्बुलेन्स सुत्केरी महिलाहरुकै लागि खरिद गरेको बताए । ‘सुत्केरी ब्यथा लागेका महिलाहरुलाई तुरुन्त अस्पताल पुर्याउन सजिलो होस्, उपचार अभावमा शिशु र आमा दुबैको ज्यान जोखिममा नपरोस् भन्ने उद्देश्यले नीतिगत रुपमै यस्तो प्रस्ताब ल्याएका हौं’ प्रमुख देउवाले भने ।
नवजात शिशु र सुत्केरी आमाको स्वास्थ्यलाई मध्यनजर गरी प्रत्येक सुत्केरी महिलालाई एक केजी ध्यू, हरियो सागपात, गेडागुडी लगायत पोषिलो खाने कुरा लिएर बधाई दिने गरेको पनि उनले बताए । अरुले पनि बधाई दिने क्रममा यस्ता पोषिलो खाने कुरा उपहार दिन प्रमुख देउवाको आग्रह थियो ।
“समृद्ध गौरीगंगा नगर विकासको आधारः कृषि, जैविक विविधता, पर्यटन र पूर्वधार” भन्ने नारासहित तयार पारेको नीतिहरुलाई पूर्णता दिन धनगढी नगरपालिकाको आयोजनामा ओरक नेपाल, एफएमडिसी लगायतको संस्थाले समन्य र सहकार्य गरेका थिए ।
महिला खबरबाट साभार खबर