काठमाडौं। आँखा सबैभन्दा महत्वपूर्ण एवं संवेदनशील अङ्ग हो । सुन्दर आँखाले मानिसको अनुहारको सम्पूर्ण सौन्दर्य झल्काउँछ । ओठले बोल्न नसकेका शब्दहरू आँखामार्फत प्रकट हुन्छन् । अझ भनौं नारी सौन्दर्यमा आँखाको शृंगारले विशेष भूमिका खेलेको हुन्छ । प्रकृतिले प्रदान गरेको रूपमा कुनै पनि पक्षलाई एउटा कलात्मक हातले सजाएर अझ आकर्षक बनाउनु पनि आफैंमा एउटा कला हो ।
आँखाको मेकअप गर्नुअघि आँखाको रंग कस्तो छ विचार पुर्याउनुपर्छ । कसैको आँखाको आईबल खैरो त कसैको कालो वा नीलो हुन्छ । यिनै रंगसँग मेल खाने रंग चयन गर्नुपर्छ । आँखाको मेकअप गर्नुअघि आँखीभौंको सेप राम्रोसँग मिलाउनुपर्छ । कसैको आँखीभौं पातलो भए त्यसलाई आइब्रो पेन्सिलले मिलाएर अनुहारको बनावटअनुसार ठिक्कको आकार दिन सकिन्छ । त्यसपछि आइलिडलाई बेस कोटद्वारा एप्लिकेटरको सहायताले मिलाएर विस्तारै फैलाउनुपर्छ । यदि डार्क सर्कल छ भने कन्सिलर प्रयोग गर्नुपर्छ । कन्सिलर स्किन टोनअनुरूप हुनु आवश्यक छ । हाईलाईट गर्दा आँखीभौंको ठीक तल उठेको भागमा गोल्डेन आइभरी सिल्भर वाइट आदि आइस्याडो प्रयोग गर्नुपर्छ । आफूले लगाएको पहिरनसँग मेल खाने कलरको आइस्याडो लगाउनु वेश हुन्छ ।
आइस्याडो लगाउँदा आँखाको कुनादेखि ब्रसको सहायताले विस्तारै लगाउँदै–लगाउँदै किनारा अथवा कोषमा लगाएर डार्क सेडो (गाढा) लगाउने र अझ त्यसमा स्लेटी गाढा हुनुपर्छ जसले गर्दा स्मोकी लुक देखियोस् । अब आँखाको परेलामा मस्कारा लगाउनुपर्छ । यसले परेला बाक्लो देखिन्छ । आईलाईनर हल्का हातले विस्तारै लगाउनुपर्छ र अन्त्यमा गाजल लगाउनुपर्छ । यदि कसैको परेला एकदम पातलो छ अथवा छँदै छैन भने प्रस्ट देखिने गरी मिलाउन फल्स मस्कारा (नक्कली परेला) लगाउन सकिन्छ । मौसमअनुसार गर्मी अथवा वर्षामा वाटर प्रुफ मेकअप गर्न सकिन्छ ।
जसरी हामीले आँखाको मेअपमा ध्यान दिन्छौं त्यसैगरी आँखाको स्वास्थ्यका लागि पनि उत्तिकै ध्यान दिनु आवश्यक छ ।
–सुत्नुअघि आई रिमुभरले आँखाको मेकअप सफा गर्नुपर्छ ।
–एउटा कपासको टुक्रामा रिमुभर भिजाएर पुछ्नुपर्छ ।
–दैनिक कम्तीमा ८ घन्टा सुत्नुपर्छ ।
–धेरै बेर अथवा लेट नाइट टेलिभिजन हेर्नु राम्रो होइन ।
–टेलिभिजन हेर्दा कम्तीमा आधा घन्टाको फरकमा आँखामा पानीको छिटाले १०–१५ पटक छ्याप्नुपर्छ ।
–भिटामिन ई र डी सेवन गर्नुपर्छ ।
दैनिक गाजर, पाकेको फर्सी, केरा, मेवा आदि सेवन गरे आँखालाई फाइदा हुन्छ । यसका साथै समय–समयमा शुद्ध गुलाबजलको केही थोपाले आँखा सफा गरे आँखालाई थकानबाट मुक्ति एवं शीतलता प्रदान गर्छ । हप्तामा एकपटक आलु वा काँक्रोलाई स्लाईस गरेर आँखा बन्द गरी २० मिनेटसम्म राख्नाले फाइदा हुन्छ । यसबाट आँखा वरिपरि देखिने कालो दाग पनि क्रमिक रूपमा हटेर जान्छ । गर्मीमा घर बाहिर निस्कदा कालो चस्मा र छाता प्रयोग गर्नुपर्छ । आँखा चिलाउने अथवा पानी आउने समस्या देखापरे जँचाउनुपर्छ ।