अब देशभरका छात्रालाई निस्शुल्क स्यानेटरी प्याड
दिवाखाजाको पैसा आमालाई दिइने

जेठ १५, काठमाडौं । आर्थिक वर्ष २०७६र०७७ का लागि शिक्षा क्षेत्रमा १ खर्ब ६३ अर्ब ७६ करोड छुट्याएको अर्थमन्त्री युवराज खतिवडाले जनाएका छन्।

बुधबार बजेट भाषण गर्दै उनले शिक्षामा बजेट वृद्धि गरेको बताए।

विद्यालयमा स्यानेटरी प्याड निस्शुल्क उपलब्ध गराउने, दिवाखाजा वितरण गर्ने जस्ता व्यवस्था उनले शिक्षासम्बन्धी कार्यक्रममा उल्लेख गरेका छन्।

दिवाखाजाका लागि ५ अर्ब ९५ करोड छुट्याएको अर्थमन्त्री खतिवडाले बताए।

उक्त रकम विद्यार्थीका आमालाई दिइने व्यवस्था गरेको पनि बजेट भाषणमा उनले उल्लेख गरे।

३०० नयाँ विद्यालय बनाउन ८ अर्ब ५३ करोड छुट्याएको उनले बताए।अर्थमन्त्री खतिवडाले आउँदो वर्ष मदनभण्डारी विश्वविद्यालय स्थापना गर्न सरकारले १ खर्ब ७५ करोड छुट्याएको बताए।

गत वर्ष शिक्षा, विज्ञान तथा प्रविधि क्षेत्रमा १ खर्ब ३४ अर्ब ५० करोड ८७ लाख छुट्याइएको थियो। ४६ अर्ब ५३ करोड ६४ लाख रूपैयाँ संघमा २८ अर्ब ५७ करोड ३ लाख प्रदेश र ८५ अर्ब ११ करोड ५० लाख स्थानीय तहलाई शिक्षाका लागि बजेट विनियोजन गरिएको थियो।